പരാജയത്തിൽ നിന്നും വിജയം കൊയ്ത ഒരു യുവ സംരംഭകൻ
നമ്മളിൽ പലരും പ്രചോദിപ്പിക്കുന്ന വിജയകഥകൾ കേൾക്കാൻ ഇഷ്ടമുള്ളവരാണ്. മിക്ക വിജയങ്ങൾക്കും പരാജയത്തിൽ നിന്ന് പഠിച്ച പാഠങ്ങളുടെ കഥ പറയാൻ ഉണ്ടാകും. ഈ പരാജയ പാഠങ്ങൾ വിജയത്തിലേക്കുള്ള വഴി കാട്ടാറുണ്ട്. ബിസിനസിലും അങ്ങനെ തന്നെ. ലാഭം മാത്രമല്ല നഷ്ട കണക്കുകളും പകര്‍ന്ന് തരും ബിസിനസ് വിജയിപ്പിക്കേണ്ടത് എങ്ങനെയാണെന്നുള്ള പാഠം. തകര്‍ച്ചയിൽ ആയിരുന്ന കുടുംബ ബിസിനസ് ഏറ്റെടുത്ത് വിജയിപ്പിച്ച് കോടികളുടെ വരുമാനം നേടുന്ന നിരവധി പേരുണ്ട്. അത്തരത്തിൽ ഒരു വിജയകഥയാണ് വി.ആര്‍ ട്രേഡേഴ്സ് എന്ന കമ്പനിയുടമക്കും പറയാനുള്ളത്. എം എസ് സ്റ്റീൽ, എച്ച് ആർ ഷീറ്റ്, സി ആർ ഷീറ്റ് തുടങ്ങിയ സ്റ്റീൽ ഉൽപ്പന്നങ്ങളുടെ വ്യാപാരം നടത്തിയിരുന്ന കാൺപൂർ ആസ്ഥാനമായുള്ള സ്ഥാപനമാണ് വി ആർ ട്രേഡേഴ്സ്. ഒരു തകര്‍ച്ചയിൽ നിന്നാണ് വിജയത്തിൻെറ തുടക്കം.
ഒറ്റ ഇടപാടുകാരൻ വരുത്തിയ നഷ്ടം
അച്ഛൻ നടത്തിയിരുന്ന ബിസിനസ് ഭീമമായ നഷ്ടം നേരിട്ടതാണ് മകൻ രജത് ഗുപ്തയെ വിആര്‍ ട്രേഡേഴ്സിൻെറ ബിസിനസ് ഏറ്റെടുക്കാൻ പ്രേരിപ്പിച്ചത്. ഇലക്ട്രോണിക്സ് ആൻഡ് ഇൻസ്ട്രുമെൻേറഷൻ എഞ്ചിനീയറിംഗിൽ ബി.ടെക്ക് ബിരുദധാരിയായിരുന്ന രജത് അച്ഛന് പ്രതിസന്ധി ഘട്ടത്തിൽ ഒരു ആശ്രയമാകുകയായിരുന്നു. ഒരു പ്രധാന ഇടപാടുകാരൻ നഷ്ടപ്പെട്ടതു മൂലം അച്ഛൻെറ ബിസിനസ് കടുത്ത നഷ്ടത്തിലായി.
കാൺപൂരിലെ സ്കൂട്ടർ നിർമ്മാണ കമ്പനിയായ എൽഎംഎൽ സ്കൂട്ടേഴ്സിന് സ്റ്റീൽ സാമഗ്രികൾ വിതരണം ചെയ്യുകയായിരുന്ന കമ്പനി. എൽഎംഎൽ പ്രധാന ക്ലയൻറായിരുന്നു. എൽഎംഎൽ അടച്ചുപൂട്ടിയതാണ് ബിസിനസിന് വലിയ നഷ്ടം ഉണ്ടാക്കിയത്. വിആർ ട്രേഡേഴ്‌സിന് ഏകദേശം 10 കോടി രൂപയാണ് നഷ്ടമുണ്ടായത്. കുടുംബവും കടക്കെണിയിൽ. അങ്ങേയറ്റം സമ്മര്‍ദ്ദം നിറഞ്ഞ നാളുകൾ. കടുംബത്തിനും എല്ലാ പ്രതീക്ഷയും നഷ്ടപ്പെട്ടു. ഈ അവസരത്തിലാണ് ബിസിനസ് ഏറ്റെടുക്കാൻ രജത് തീരുമാനിക്കുന്നതും മുന്നോട്ട് വരുന്നതും.
വിജയത്തിലേക്കുള്ള യാത്ര
2000-ൽ അച്ഛൻ തുടങ്ങിയ ബിസിനസ് 2018 ആഗസ്റ്റിൽ ആണ് രജത് ഏറ്റെടുക്കുന്നത്. കുടുംബത്തിൻെറ ഉടമസ്ഥതയിലുള്ള സ്വത്തുക്കൾ എല്ലാം വിറ്റ് കടങ്ങൾ എല്ലാം തീർക്കുകയാണ് ആദ്യം ചെയ്തത്. ഒരു ഫ്ലാറ്റും സ്ഥലവും രണ്ട് കാറുകളും വിറ്റു. കാര്യങ്ങൾ വിചാരിച്ച പോലെ എളുപ്പമായിരുന്നില്ല. അച്ഛനെയും ജ്യേഷ്ഠനെയും കാര്യങ്ങൾ ബോധ്യപ്പെടുത്തി. ബിസിനസ് വിജയിക്കുമെന്ന് അവർക്ക് വാക്ക് നൽകി. പുതിയ ഇടപാടുകാരെ സമീപിക്കുകയാണ് പിന്നീട് ചെയ്തത്. ആളുകളെ കാണാനും മറ്റ് നഗരങ്ങളിലേക്ക് യാത്ര ചെയ്യാനും കമ്പനിക്ക് വേണ്ടി പുതിയ ബിസിനസ്സ് നേടാനുമായി പിന്നീടുള്ള ശ്രമങ്ങൾ.
പുതിയ ഇടപാടുകാര്‍, പ്രോജക്ടുകൾ
പലപ്പോഴും കാറിൽ തന്നെ കിടന്നുറങ്ങി. 2019-ൽ അലഹബാദ് കുംഭമേളയോട് അനുബന്ധിച്ചുള്ള നിർമ്മാണ പ്രവര്‍ത്തനങ്ങൾക്കായി സ്റ്റീൽ ഉത്പന്നങ്ങൾ നൽകാൻ എട്ട് കോടി രൂപയുടെ ഒരു കരാര്‍ ലഭിച്ചു. 50 ലക്ഷം രൂപ വായ്പയെടുത്ത് പ്രോജക്ടുമായി മുന്നോട്ട് പോയി. 2018-19-ൽ തന്നെ കമ്പനിയുടെ വിറ്റുവരവ് 24 കോടി രൂപയിലെത്തി. 2020-21ൽ അത് 60 കോടിയായി ഉയർന്നു. ഈ സാമ്പത്തിക വർഷത്തിൽ 65 കോടി രൂപയിലധികം വിറ്റുവരവാണ് കമ്പനി നേടിയത്. പരാജയത്തിന് മുന്നിൽ തോറ്റുകൊടുക്കാൻ തയ്യാറല്ലാതിരുന്ന ഒരു യുവ സംരംഭകൻെറ ബിസിനസ് വിജയം.
